रायपुर:- छत्तीसगढ़ी गाना-जगत म आजकल “कनिहा म बेनी झुलाये कइसे” भारी हल्ला मचाय हवय। रिलीज होत ही गाना मनखे मन के पहिली पसिंदा बन गे हवय अउ सिरिफ कुछ दिन म 2 मिलियन ले ज्यादा व्यू पा ले हवय। ए गाना ला अपन मधुर सुर म गाइस हे सुनील सोनी अउ कंचन जोशी, संगवारी मन ला बता देत हन की संगीत के जादू बिखेरिस हे प्रसिद्ध संगीतकार घनश्याम गंधर्व। गाना के ताजगी भरी धुन अउ छत्तीसगढ़ी संस्कृति के झलक सुनइया मन ला खूब भा जात हवय। सोशल मीडिया म लोगन मन ए गाना म रील अउ वीडियो बनाके शेयर करत हवय। खास करके युवा मन ए गाना के लोकप्रियता बढात हवय अउ ए गाना ला बहुतच सुने हवय अब्बड़ पसंद करत हवय अउ अपन संगवारी ला घलो बतावत हवय। गाना म लक्षित झांझी अउ आरवी सिन्हा के जोरदार अदाकारी अउ दुनो के केमिस्ट्री देखइया मन ला खूब भा जावत हवय। ए गाना के दृश्यांकन म छत्तीसगढ़ी लोक-संस्कृति अउ गाँव के जिनगी के साफ झलक देखे ला मिलथे, जऊन ले गाना अउ ज्यादा खास बन गे हवय। संगीत प्रेमी मन के कहना हे के आगू के दिन म ए गाना नवा-नवा रिकॉर्ड बनाही अउ छत्तीसगढ़ी म्यूजिक जगत ला नवा उचाई मं पहुंचाही।
“मर जाहूँ तोर मया मं” ले चर्चित बने निर्माता-निर्देशक अखिलेश कोमल
एही बीच छत्तीसगढ़ी फिल्म-जगत म रोमांटिक फिल्म “मर जाहूँ तोर मया म” घलो भारी चर्चित होवत हवय। ए फिल्म के निर्माता अउ निर्देशक अखिलेश कोमल हवय, जऊन अपन बढ़िया सोच अउ अलग अंदाज बर पहचाने जाथें। फिल्म के कहानी म रोमांस संग-संग छत्तीसगढ़ी माटी के खुशबू अउ समाजिक संदेश के अनोखा मेल देखे ला मिलही। अखिलेश कोमल के निर्देशन अउ ठोस प्रस्तुति देखइया मन ला नवा अउ यादगार सिनेमा अनुभव देबर वादा करत हवय।
